President hlui Kalam-a ruang an khua thlenpui

Thawhṭanni zana thi, President hlui, Dr APJ Abdul Kalam-a ruang chu nimin khan Delhi aṭangin an khua, Tamil Nadu-a Rameswaram khua thlenpu a ni a, vawiin-ah chawimawina famkim nen vui a ni ang.

Nimin zing dar 8 khan President hlui ruang hi IAF aircraft hmangin Delhi Palam airport aṭangin Rameswaram panpui a ni a, Palam airport-ah force pathumte chuan an thlah liam a ni.

Kalam ruang hi Union minister Venkaiah Naidu leh Manohar Parrikar-te chuan an khua, Rameswaram thlengin an zui.

President ruang phurtu thlawhtheihna hian Delhi aṭangin Madurai a pan a, Madurai aṭang hian IAF helicopter hmangin an khua panpui leh a ni. Rameswaram khua thlenpui a nih hnu hian, amah ngaisangtute'n zahna an hlan theihna turin a ruang hi school-ah dah a ni. President hlui ruang hi an khuaah hian mi tam takin an lo hmuak.

Vawiin dar 11-ah state chawimawina famkim nen Abdul Kalam hi Rameswara-ah hian vui a ni ang. A vuina inkhawmah hian Prime Minister Narendra Modi bakah chief minister eng emaw zat an tel ang.

Rameswaram khua hi Hindu pilgrimage centre a ni a, Ramanathapuram district-a awm niin Chennai aṭanga kilometre 600 vela hla a ni. Kalam hi he khuaa piang leh seilian a ni.

Kalam thlah tur hian a khaw chheh vel aṭang pawhin amah ngaisangtu mi tam tak an punkhawm rin a ni a, hemi atan hian tualchhung thuneitute pawh a ṭul angin an inbuatsaih nghal a ni..

Tamil Nadu sorkar chuan President hlui zahna lantirna atan, vawiin hian state pumah public holiday a puang. State sorkar chuan Abdul Kalam an chawimawina leh zahna lantir nan, Negotiable Instruments Act, 1881 hnuaiah chawlh puan a ni, a ti. Chief Minister J Jayalalithaa-i chuan President hlui phumna atan hian a chhungte ngenna angin sorkarin ram a pe tih a sawi.