SC-in Memon dilna a hnawl
Khaihlum tura thiam loh chantir, Yakub Memon-a'n a hremna ngaihtuah ṭha leh tura a ngen nawnna chu nimin khan Supreme Court chuan a hnawlsak leh.
Memon-a ngenna hi hnawlsak anih leh tak avangin ruahman lawk angin tukin zing hian a tanna, Nagpur District Jail-ah khaihlum a ni ang.
Maharashtra Governor, Vidhyasagar Rao pawhin nimin vek khan Memon-a'n zahngaihna lantir tura a dilna chu a hnawlsak bawk.
Kum 1993-a Mumbai khawpuia ṭum eng emaw zat bomb tihpuahnaa inhnamhnawiha puha thiam loh chantir, Yakub Memon hi tukin zing dar 7-ah Nagpur jail-ah khaihlum tura tih a ni. Vawiin hi a piancham vawi 54-na a ni bawk. Mumbai-a bomb puak vang hian mi 257 an thi a ni.
Memon hian a thubuai ngaihtuah dan leh thiam loh chantir a nih dan chu a dik tawk lo tiin Supreme Court-ah hian a sawi a, hei vang hian vawiina tihhlum a nih tur hi dang turin a ngen a ni. A ukil pawhin khaihlum a nih tur hi April 30 khan TADA court Mumbai-in tichhuak tawh mah se, tihhlum a nih hun hi a hma ni 17 awmah hriattir a ni ve chauh a ni, a ti. Mahse SC chuan Memon-a thi tura hremna pek a ni danah tihsual a awm lo tiin a sawi.
Mumbai khawpui beihnaa inhnamhawiha puha thi tura thiam loh chantir dang mi 11-te chu zahngaihna lantir tura an dilna pawmsak vek an ni a, hei vang hian mi tam tak chuan an tihsual a inang reng a ni tiin, Memon zahngaih dilna hi pawmsak turin President pawh an lo ngen tawh a ni. Memon tana dilsaktu zingah hian politician, jurist leh retired judge-te pawh an tel.