LS Speaker-in all party meeting a ko

Parliament Monsoon session neih mekah Lalit Modi leh Vyapam scam vangin eptute an au buai reng a, rorel mumal thei loin hun rei tak an awm tawh a ni.

Nimin khan Lok Sabha Speaker Sumitra Mahajan chuan House-ah mumal zawka ro rel a nih theih dan kawng zawngin all party meeting a ko. President hlui, Dr APJ Abdul Kalam sunna atan nimin khan Parliament in hnihah rorel inkhawm tihtawp a ni.

Parliament session-ah hian eptu pawl, a bikin Congress party chuan dan bawhchhetu, Lalit Modi-a ṭanpuia puh, External Affairs Minister chu bang turin an nawr a, a ni bakah hian BJP chief minister pahnih, Vasundhara Raje leh Shivraj Singh Chouhan-te pawh bang turin an phut bawk. Rajasthan CM Raje hi Modi-a ṭanpuitua puh a ni bawk a, Chouhan hi an state, Madhya Pradesh-a sum tam tak inrawlhna, Vyapam scam chungchang avangin bang turin an phut a ni.