Rajnath Singh-a'n China nena ramri buaina tawp se a duh 'Mahse kan ram inches khat an lak pawh kan remti lo ang'
Defence minister Rajnath Singh chuan nimin khan Ladakh khawchhak lam ramria China nena harsatna awm ṭhin chu tawp tawh se a duh thu a sawi a, hemirual hian India sipaite chuan ramdang mi ten India ram inches khat lek an laksak pawh an phal ngai dawn lo tih a sawi.
"India sipai huaisen tak tak te chuan ram tan an nunna an hlan a ni. India chuan ramria China nena buaina a neih fo chu tawp tawh se a duh a, remna leh muanna a awm theih nana hmalak chu India thil tum a ni. Mahse hetih lai mek hian ramriah thil dik lo a thleng leh fo ṭhin. Kan sipaite hian tumahin kan ram inches khat lek pawh an rawn lak hi an phal ngai lo ang, " tiin nimina Darjeeling-a Sukna War Memorial hmuna Shastra Puja a hmannaah Singh chuan a sawi.
Shastra Puja hmannaah hian Chief of Army Staff Gen. MM Naravane leh sipai senior officer tam tak te pawh an tel a ni. Singh hian puja hun a hmang a, puja a hman zawh hian video conference kaltlangin Sukna-a 33 Corps headquarters aṭangin kawng thar, Alternate Alignment Gangtok-Nathula Road chu a hawng.
June 15-a Ladakh khawchhak lam, Gaiwan Valley-a China sipaite nena an inbeihnaah India sipai 20 chuan an nunna an chan a, he thil thleng hian ramri chungchanga ram pahnihte inkar boruak ṭha lo pawh a tihzual phah a ni.
China chuan he inbeihna thlen ṭuma a sipai thi leh hliam zat hi tun thlengin a la puangzar lo. India lam chuan China sipai thi hi an awm nual niin an sawi.