Rafale fighter jet leina tur ziak fel ta

Air Force hman tur, Rafale fighter jet 36 zet lei turin India leh France chuan inremna an ziak fel thei ta.

Rafale fighter jet lei tur chungchangah hian India leh France hi hun rei tak an inbe tawh a, nimin khan inremna hi tihfel an ni ta a, Defence Minister Manohar Parrikar leh France Defence Minister Jean Yves LeDrian-te'n Delhi-ah contract an ziak ta a ni.

Dassault Rafale twin-engine fighter aircraft 36 man atan hian India chuan cheng vaibelchhe 58,000 a pe dawn a, heng zinga 15% chu advance-in pek a ni tawh.

IAF hman tur Rafale indo thlawhtheihna hi km 100 chuanga hmelmate aircarft leh cruise missile-te kap fuh thei turin Meteor missile nen thuam a ni dawn a ni. Hetiang ralthuam hi Pakistan leh China pawhin an la nei lo.

Contract ziahfel a nih tak avangin thla 18 chhungin indo thlawhtheihna hmasa ber chu thla 18 chhungin India kutah hlan mai tura tih a ni.

Ram pahnihten inremna an siam hnuah, aircraft man atana France-in a dawn, cheng vaibelchhe 58,000 aṭangin 30% chu India rama military aeronautic kaihhnawih research programme kalpuina atan a invest ang.

India hian fighter squadron 33 a nei mek a, squadron tinah hian fighter plane 18 an awm. Mahse China leh Pakistan-te beiletna tur chuan combat unit 45 a mamawh niin IAF chuan a sawi a, indo thlawhtheihna a neih mek chu a la tawk lo hle a ni, a ti.