Sahara hotu jail-ah dah lut leh dawn

Investor-te sum tam tham tak tichingpentu, Sahara Group hotu Subrata Roy chu kum hnih chhung jail-ah tantir a nih hnuah chhuahtir lailawk a ni a, a chhuah theih hun hi court-in a pawhsei sak duh loh avangin jail-ah dah luh leh a ni dawn.

Supreme Court chuan a nu vuinaa a tel theihna turin Roy hi May 6 khan chhuah lailawk phalna a pe a, vawi eng emaw zat pawhsei sak niin, kar hmasa khan, September 29 thleng atan pawhsei sak leh a ni. Hemi hnua Roy-a'n pawhsei belh leh tura a ngenna chu court chuan a hnawlsak ta a ni.

Roy-a ukil, Rajeev Dhavan chuan court rorel dan chu ṭha a tih loh thu sawiin, Sahara thil neihte chu market regulator Sebi nena inzawm a nih avangin hralh theih a ni lo tih a sawi.

Court chuan Sahara Group hnenah hian an hnena sum dahtute pawisa, cheng vaibelchhe 25,000 zet chu engtinge a neih theih dawn tih sawi turin a lo hriattir tawh a, Sebi hnenah Sahara-in ram≠dang≠a a thil neihte hralha sum a tuak dan chu thlithlai reng turin a hrilh bawk.

Sahara hian scheme hrang hrang a siam hmanga an hnena sum dahtu, mi vaibelchhe thum dawn hnen aṭanga a sum lakkhawm rulhna tur hian cheng vaibelchhe 24,000 deposit turin Supreme Court chuan a lo hriattir tawh. Investor-te sum a batsak rulhna tur hian Sebi hnenah Sahara thil neih hrang hrangte hralh turin a ti bawk a ni.