Nestle-in Maggi hlui halral phalna dil

Nestle company chuan Maggi noodles an siama danin a phal chin aia tam, lead leh monosodium glutamate (MSG) hmuh a nih avanga tichhe tura hriattir an nih hnuah, Maggi hlui ton 38,000 an tichhe tawh tih an sawi a, a bak ton 550 la awmte chu halral phalna Supreme Court-ah a dil.

Company chuan food regulator-in Maggi hralhchhuah a khapsak avangin an siam≠chhuah tawh ton 38,550 chu tihchhiat turin an lakkir leh tih a sawi. A tam zawk an tichhe tawh a, ton 550 tihchhiat la bakte chu halral an tum a ni.

Maggi siamchhuah tawh tihchhiatna atan hian company chuan cheng vaibelchhe 30 zet a seng a, an thil tihchhiat hlutzawng hi cheng vaibelchhe 420 man a ni. Maggi an lakkir te hi ramchhunga hmun hrang hrang 30-ah an dahkhawm a ni.

Nestle lawyer Haris Salve chuan stock la awmte chu halral vek a nih theihna turin Supreme Court-ah a dil a, tihchhiat loha dah khawm reng chu a bul vela mite hriselna atan pawh a ṭhat loh a hlauhthawn thu a sawi. Hetihlai hian Food Safety and Standards Authority of India's (FSSAI) lam chuan company-in a hmaa a lo tihchhiat tawhte chu danin a phut ang taka kalpui a ni lo tih a sawi a, hei bakah hian an thil siam dik lohna finfiahna tur awm loa an stock zawng zawng tihral vek chu phalsak lo turin court hi a ngen thung.

Hetihlai hian Nestle-in Maggi a siam chhuah thar lehte chu enfiah a nih hnuah lead leh MSG chu danin a phal chin huam chhung vek an ni tawh a, a siam tharte chu hralhchhuah phalsak an ni leh tawh a ni.