NH-a thihna thlen tam ber dawttu -Wrong-side-a tlan

'Road Accident in India 2019' report aṭanga a lan dan chuan nikum chhunga National Highway (NH) a chetsualna thleng vanga thihna thlen chhan tam ber dawttu chu wrong-side-a tlan vang a ni.

Kum 2019 chhung khan wrong-side-a tlan vangin mi 9,200 laiin nunna an chan phah a, hemi hmun lia ṭhena hmun khat aia tam mah, 2,726 chu NH-a thleng a ni nghe nghe. Kum 2018-ah pawh khan wrong-side-a tlan vanga lirthei chesuala thi an tam hle a, 8,764 lai an awm.

'Road Accident in India 2019' report hi Road Transport Ministry hnuaia Transport Research Wing tihchhuah a ni a, kum 2019 chhung khan NH-a chetsualna thlengah mi 53,872 lai an thi a, state highway-ah mi 38,472 an thi bawk. 

Report chuan highway (NH leh state) chu road network zawng zawng aṭanga 5% vel a nih thu tarlangin, kum 2019 chhunga kawngpuia chetsualna thleng 55% vel lai chu heng highway-a thleng hi a nih thu leh lirthei tlanchak vang piah lamah lirthei tam tawh lutuk vanga chetsualna thleng a nih tlangpui thu a tarlang a ni.

Data aṭanga a lan dan chuan NH kawngpuia chetsualna thleng tam ber chu tlan chak vang a ni a, tlan chak vanga chetsualna thlengah hian mi 36,566 laiin nunna an chan. Wrong-side-a tlan vanga chetsualna thleng vanga thi chu tam ber dawttu niin zu rui chunga lirthei khalte vanga chetsualna thleng chu pathumna a ni. Nikum chhung khan zurui chunga lirthei khalh vanga chetsualna thlengah mi 2,376 an thi.