J&K-a ṭangrual pawl hotuah Farooq Abdullah

Jammu and Kashmir-a ṭangrual pawl din thar, People's Alliance chuan kar liam ta Inrinni khan an hruaitu turte siam remin, National Conference hotu Farooq Abdullah chu president atan dahin, People's Democratic Party (PDP) hotu Mehbooba Mufti chu vice president-ah dah a ni. 

Ṭangrual pawl hian nikuma paih sak,  J&K state flag hlui chu an pawl flag atan an hmang chhunzawm dawn a ni. 

Meeting zawha chanchinthar lakhawm­tute a kawmnaah, Abdullah chuan ṭangrual pawl an din, PAGD (People's Alliance for Gupkar Declaration) chuan BJP lamin anti-national tiin an sawi a, mahse hei hi thu dik lo a nih thu a sawi. "He pawl hi anti-BJP chu a ni ngei a, mahse anti-national erawh a ni lo," a ti. 

PDP hruaitu Mufti chuan J&K flag hlui chu  hman a nih leh hma loh chuan J&K-ah India ram flag chu a pawtpharh tawh ngai lo ang tih a sawi. A thu sawi hian sawizui a hlawh hle a, BJP chuan ram phatsantua puhin thubuai siamsak an phut nghal.