Ramchhung Lawrkhawm

GST Council-in Registration tifel thuai dawn

Sorkar laipuiin chhiah lak dan tar, Goods and Services Tax (GST) nakkum April thla aṭanga hman ṭan tura a ruahman chu a hun taka hman ṭan a nih theihna turin, GST Council chuan registration chung≠changa a ṭulte a tifel thuai dawn.

GST Council hian registration, invoice leh payment chungchangah taxation department-in draft rule a siam chu Zirtawpni hian a tihfel theih beisei a ni. Revenue Secretary Hasmukh Adhia chuan GST Council-a draft rule thehluh hi sumdawngtuten enin, comment pawh an pe thei tih a sawi.

Pakistan chungchang ngaihtuahin meeting nei dawn

Prime Minister Narendra Modi chuan Pakistan hnena Most Favoured Nation (MFN) status pek chungchang chu ngaihtuah ṭha turin meeting a ko a, meeting hi naktukah neih a ni ang.

Kum 1996 khan Pakistan ram hi World Trade Organisation-a General Agreement on Tariffs and Trade (GATT) hnuaiah MFA status pek a ni a, sumdawnna lama a thawhpui ṭhianṭha ramah a pawm a ni. Mahse tun hnaiah Pakistan firfiakten Jammu and Kashmir-a Uri army camp an beih leh tak avangin status pek chungchang hi ngaihtuah ṭhat a tum ta a ni.

Meeting-ah hian external affairs ministry leh commerce ministry official-te an tel ang.

Muzaffarnagar buaina tuartute tan Rs nuai 15 pe dawn

Uttar Pradesh Chief Minister Akhilesh Yadav-a chuan Muzaffarnagar tualchhung buaina chhuak avanga chin hriat loha awm, mi 18 chhungte hnenah cheng nuai 15 ṭheuh pek an ni dawn tih a sawi.

Kum 2013, September thla khan Muzaffarnagar khuaah hian buaina nasa tak chhuakin, mi 60 chuangin an thih phah bakah , mi 40,000 vel chu himna zawngin an tlanchhia a ni.