Delhi khawpui vawng fai turin LG-in ngen

Delhi Lieutenant Governor Najeeb Jung chuan Delhi-a civil body-te chu khawpui vawn fai hna ngai pawimawh turin a ngen a, khawpui chhungah chikungunya leh dengue hri a len avangin bawlhhlawh dahkhawmte chu ni khatah ṭum hnih tifai ṭhin turin a ti.

Hetih lai hian khawpui chhung≠a sanitation worker-te chuan an hna tinghet tur leh, arrear pek phutin nimin aṭang khan tiam chin awm loin nawrh an huaihawt.

Thawhṭanni a high level meeting neihah, Delhi LG hian municipal commissioner leh chairman-te chu bawlhlawh dahkhawmte paihfai a ni em tih enfiah ṭhin tur leh, bawlhhlawh dahkhawmna hmun chu ni khatah vawi hnih tifai thin turin a hrilh a, bawlhhlawh paihkhawmna hmun endiktute chuan municipal commissioner hnenah hian ziakin report an thehlut ziah tur a ni, a ti.

Meeting-ah hian Delhi Deputy Chief Minister Manish Sisodia, agency hrang hranga senior officer bakah health minister te an tel. Deputy commissioner zawng zawngte chu an district chhunga private hospital-te tlawh vek tura hrilh an ni a, damlo rethei enkawl duh lo an awm nge awm lo tih finfiah tura hriattir an ni.

Municipal Corporation of Delhi (MCD) leh New Delhi Municipal Council (NDMC) offcial-te chuan chinkungunya leh dengue hri leng mek do let tura civil body hmalaknate chu LG hi an hrilh a, kar kalta chhung khan hri vei thar pawh an tlahniam sawt hle niin an sawi.

Sanitation worker-te chuan khawpui chhung thenfai hna thawktute chu an hna-a dah ngheh te, medical card leh hnathawktu dangten hamṭhatna an dawn angte pek ve an phut tih an sawi. Bawlhhlawh thenfai hna an thawhnaah gumboot, hmai tuamna leh kutkawr te pawh pek an ni ngai lo tih an sawi a, an thil phut tihhlawhtlin a nih loh chuan hna thawk loin, National Highway-24 pawh dan tel an tum tih an tarlang.