EC-in inthlan neih tur atana inbuatsaih turin hriattir

Election Commisson chuan Uttar Pradesh-a district magistrate leh superintendent of police-te chu nakkum, kumtir lama state assembly inthlan neih tura atana inbuatsaih turin a hriattir.

Ni thum chama Uttar Pradesh tlawhtu, Chief Election Commissioner Nazim Zaidi kaihhruai EC team chuan Thawhṭanni khan Lucknow-ah district hrang hrang thuneitute hi an kawm a, meeting zawh hnuah press conference an nei nghal bawk. UP tlawhtu EC team-ah hian election commissioner pahnih - AK Joti leh OP Rawat, deputy election commissoner - Umesh Sinha leh Vijay Kumar Deve, director general Dilip Sharma leh director (planning) Nikhil Kumar-te an tel.

EC team hian district 75-a district magistrate leh superintendent of police-te kawmin, inthlan lam rilru hawi a, inbuatsaih ṭan turin a hrilh a, polling station tinah tui thianghlim in tur, inthliarna, power supply ṭha a awm thehna tura ruahmanna siam turin a hriattir. Police hotute pawh an district chhung ṭheuhah buaina chhuah hlauhawmna hmunte enfiah turin a ti bawk. Boruak muanawm tak hnuaiah mipuite vote an thlak theihna turin venhimna lam pawh kalpui
ṭha turin a hriattir bawk.