December hmain Cauvery tui pe chhuak thei lo

Karnataka state chuan December hma chuan Cauvery lui tui chu a ṭhenawm, Tamil Nadu state tan a pechhuak thei dawn lo tih a sawi.

Supreme Court chuan September 20 khan Karnataka state hnenah hian Tamil Nadu tan Cauvery tui hi kar khat chhung nitin cusecs 6,000 pe turin a lo hriattir tawh a ni. Mahse court thupek tihchhuah hnu hian Karnataka sorkar chuan special session neiin an rel zui nghal a, lui tui chu in tur atan chauh pechhuak rih turin resolution an pass nghal a ni.

Nimin khan Chief Minister Siddarmaiah kaihhruaiin Karnataka sorkar aiawhte chuan Supreme Court hnenah hemi chungchang hi an thlen a, an state-a khawpui lian hrang hrangte chuan tui in tur pawh an indaih lo hnai tawh tih sawiin, December thla hma chuan lui tui a pe chhuak thei lo tih an hrilh.

Tamil Nadu tana lui tui an pek belh chuan an state mipuite chu tuihalin an awm mai dawn a, an thlaite pawh a chhe mai dawn niin Karnataka sorkar chuan a sawi a, hei vang hian Supreme Court chu a thupek tihchhuah chu siamṭha leh turin a ngen. Karnataka state ngenna hi vawiinah court hian a ngaihtuah ang.

Cauvery lui tui inchuh vang hian state pahnih-ah hian buaina a chhuak a, Karnataka state hian tui hnianghnara hman tur a neih bik loh avangin Supreme Court-in Tamil Nadu tana pe ṭhen tura a tih chu duh lohin, hmun tam takah lungawi lohna an lantir a ni.