Ramchhung Lawrkhawm

Tourism Summit-ah MoU ziak

New Delhi-ah Pathianni khan India Tourism Investors' Summit hmasa ber neih a ni a, he summit-ah hian tourism tihhmasawnna tur leh hospitality project thawhna tur inremna 86 zet ziah a ni a, inremna ziah hi cheng vaibelchhe 15,000 hu a tling.

Ramchhunga tourism lam tihhmasawnna turin summit hi kumtin buatsaih tum a ni a, investor-te tan dawhkan pawh buatsaih sak tum a ni bawk. Tourism and Culture Minister Mahesh Sharma chuan khualzinte hipluhna kawnga investor-te hmalakna chu an thlawp zel tur thu a sawi.

Pheikhawkin Rahul Gandhi vawm

Congress vice president Rahul Gandhi chu nimina Uttar Pradesh-a Sitapur khuaa road show a neihnaah mi pakhatin pheikhawkin a vawm a, mahse a vawm fuh lo.

Rahul Gandhi vawmtu hi local journalist, Hari Om Mishra a ni a, police-te'n an man nghal a ni. Mishra chuan Congress hruaitu hian loneitute puala Kisan Yatra a neih mekah, Uttar Pradesh-a loneitute dinhmun leh harsatna tawh mekte hre chunga hma la tawk lohah a puh a, roadshow buatsaih ringawt chu a ṭangkai lo a ni, a ti.

Goa-a Kingfisher Villa lilam turin enfiah

Bank 17-a loan cheng vaibelchhe 9,000 ba mek, Vijay Mallya-a in, Goa ami chu October 19 hian lilam a ni dawn ta.

North Goa-a Kingfisher Villa-a Condolim hi India rama Vijya Mallya-a in zinga mawi ber nia sawi ṭhin a ni. Lilamna tur buaipuitu, SBICap Trustee speical team chuan nimin khan Goa an thleng. Kingfisher Villa hi ni hnih chhung an enfiah ang a, hemi hnu hian lilam chhan tumte chuan banker-te nen a hmun hi an enfiah theih bawk ang. State bank of India kaihhruai bank 17-te chuan Goa-a Kingfisher Villa hi lilam bul ṭanna atan cheng vaibelchhe 85.29 hu angin an lo chhutsak tawh a ni.