Uri beitute hrem lohin an chhuak lo ang : PM

Prime Minister Narendra Modi chuan thla tina thu a sawi ṭhinna, radio programme 'Maan Ki Baat'-a thu a sawiah, tunhnaia firfiakten Jammu and Kahsmir-a army camp an beih chungchang a sawilang a, camp beihnaa inhnamhanwihte chu hrem lohin an chhuak lo ang, a ti.

PM Modi chuan Uri-a army camp beihnaa thi sipai 18 te chu a chhuang takzet tih a sawi a, harsatna chinfelna leh hmasawnna thlentu chu remna leh muanna, leh inlungrualna a ni, a ti. Camp beih a nih dan chu mi dawihzepte thiltih dan a ni, a ti bawk. Army camp beitute hi Pakistan firfiak, Jaish-e-Mohammed te nia puh a ni a, sipaite chuan camp luhchilhtu firfiak pali-te chu an kaphlum ve nghal a ni.

Modi chuan firfiakte kuta sipai 18 laiin nunna an chan chu ram tan channa nasa tak a ni a ti a, India mipuite chuan sipaite an la ring tawk reng a ni, a ti. "Mipui leh political leader-te chuan ṭawng chhuahna hun tam tak kan neiin kan ṭawng chhuak fo a, mahse sipaite chu an
ṭawng≠chhuak ve mai lo a, an chetze hmangin an lantir zawk a ni" a ti.

Valley-a tualchhung buaina thleng chungchang pawh sawi≠chhuakin, Modi chuan Kashmir mipuite pawhin boruak muanawm a awm an duh a, loneitute pawhin an thlaite an ngaihtuah hle a ni, a ti. Boruak muanawm a awm theih nan, dan leh thupek kengkawh turin thuneitute chuan theihtawp an chhuah thu a sawi a, mipuite chu boruak muanawm siam turin a ngen bawk.