School naupangten PM hnenah ngenna thlen

Bengaluru high school naupangte chuan Karnataka leh Tamil Nadu-te'n Cauvery lui tui an inchuh vanga hun rei tak buaina awm chu chinfel a nih theihnan Prime Minister Narendra Modi chu inrawlh turin an ngen.

Suma Public High School naupangte chuan ngenna hi siamin, "Tui inchuh vanga buaina chhuakah nunna chan te an awm a, mi tam takin hliam an tuar bawk. Kan buaina hi boruak ṭha tak hnuaia chinfel theih a ni", an ti. Supreme Court-in Tamil Nadu hnena Cauvery lui tui pe chhuak tura Karnataka state a hriattir avangin state chhung hmun hrang hrangah lungawi lohna lantirin, buaina a chhuak a ni. Supreme Court-in Septembr 20-27 chhung Tamil Nadu hnenah nitin lui tui cusecs 6,000 pe chhuak turin ti mah se, Karnataka legislature chuan Bengaluru leh Cauvery lui kama thingtlang khaw tan chauh tui hi pe chhuak turin resolution a pass.

Karnataka sorkar chuan Tamil Nadu hnena Cauvery tui pe tura hun pe rih turin vawiin hian Supreme Court-ah ngenna a thlen dawn. Chief Minister Siddaramaiah chuan Inrinni khan Prime Minister Naredra Modi chu lehkha thawnin, Zirtawpni-a Karnataka assembly special session neihah, in tur atan tih lohah chuan Cauvery lui tui pe chhuak rih lo tura resoluton an pass copy pawh a thawn tel.