Congress-in fighter jet 36 duhkhawp lo

Congress Party chuan sorkar laipui leh France-in Rafale fighter jet 36 leina tura inremna an ziahfel tak chu sawiselin, fighter jet 36 chauh chuan Indian Air Force (IAF) mamawh a phuhru zo lo niin a sawi.

Defence Minister hlu, AK Antony chuan India ṭhenawm, China leh Pakistan-te'n an Air Force lam an thuam chak mek laia fighter jet 36 chauh lei belh chu a duhkhawp lo tih a sawi. Hei bakah hian BJP kaihhruai NDA sorkar leh France sorkar-te'n inremna an ziah dan chu mipui hriata puangzar turin a phut bawk. Inremna siam danah thil dik tawk lo a awm a nih chuan India chuan a hloh nasa dawn hle a ni tiin, Congress kaihhruai UPA-in inremna a lo siampui tawhah khan, India-in a duhdante France-in a pawmpui vek hma chuan an tifel duh lo tih a sawi.

Hun rei tak buaipui a nih hnuah sorkar laipui chuan kar kalta Zirtawpni khan France hnen aṭanga Rafale fighter jet 36, cheng vaibelchhe 59,000 senga leina tur inremna a ziak fel a ni. Heng fighter jet-te hi nuclear ralthuam leh missile phur thei tur an ni. Contract ziah fel aṭanga thla 67 chhunga zawhfel tura ruahman a ni a, a hmasa ber chu thla 36 chhunga hlan hman tura tih a ni.