Ramchhung lawrkhawm

Bawng thi ruang vangin Hindu pawlin nawrh huaihawt

Hindu pawl hrang hrang chuan nimin khan New Delhi-a Karol Bagh-ah bawng thi ruang nia sawi hmuh a nih avangin lungawi lohna an lantir.

RSS volunteer-te chuan ransa ruang ṭhenkhat hi park-ah an hmu a, bawng ruang niin an sawi. Police-ah thubuai ziaklut nghalin chhui mek a nih thu police officer chuan a sawi. Lungawi lohna lantirnaah hian Hindu pawl hrang hrang, VHP, RSS, Bajrang Dal, Hindu Manch leh pawl dangte an tel a, Rani Jhani leh East Park kawngte an dang a ni.

Ram pumah Swachh Bharat Week hmang dawn

Sorlar laipuiin faina beihpui thlak hna, Swachh Bharat Mission a kalpui mekah hmalakna pakhat atan, vawiin aṭang hian rampumah Swachh Bharat Week hman a ni dawn.

Ministry of Urban Development leh Ministry of Drinking Water and Sanitation chuan, September 30 hian Vigyan Bhavan-ah ni khat awh, India Sanitation Conference (INDOSAN-2016) a buatsaih bawk ang. INDOSAN hi Prime Minister Narendra Modi-an a hawng dawn a, chief minister eng emaw zatin an telpui dawn a, Urban Development minister-te pawh an tel ang.

Rashtrapati Museum complex thar hawng dawn

Rashtrapati Museum Complex thar chu mipui tlawh theih turin October 2 aṭang hawn a ni dawn. Complex thar hawn tur hian Garages Museum leh Clock Tower bakah Stables Museum-te a huam tel a ni.

Museum Complex hi zing dar 9 aṭanga tlai dar 4 thleng mipui tlawh theiha hawn ṭhin a ni ang. A tlawh duhte chuan a hmain president office website-ah an lo book thei bawk ang. A tlawh man hi mi pakhat tan Rs 50 zel a ni a, naupang kum riat hnuai lam te erawh chawi tir an ni lo ang.