Commerce and Industry Minister Piyush Goyal-in US pan

India leh US-in ram pahnih insumdawn tawnna tih hmasawnna tur, inremna an siam bawhzui turin commerce and industry minister Piyush Goyal chuan nimin, Thawhṭanni khan US a pan niin official-in tarlang. Goyal hian US a pan hma, Pathianni khan Belgium lal fanu Astrid, India tlawha lo zin chu a lo dawngsawng bawk a ni. Princess Astrid hi March 8 thleng India-ah a cham anga, ram hruaitute a kawm bakah state hrang hrang a tlawh nghal ang.

Belgium ambassador Didier Vanderhasselt chuan, Princess Astrid hi Belgian economic mission hmang tura lo zin a nih thu sawiin, ram aiawh mi 335 leh company 180-in an rawn zui bawk. An cham chhung hian seminar leh conference ṭum 14 neih hman tum niin hengte hi sector hrang hrang - renewable energy, defence, eco-construction, life sciences, leh steel decarbonisation lam thlurbing tum a nih thu a sawi. Economic mission hman pui tur hian Princess Astrid hi Belgium foreign minister Maxime Prévot in a rawn ṭawiawm bawk.

Minister Goyal hian US a thlen hnuah US Trade Rpresentative (USTR), Jamieson Greer leh US Commerce secretary Howard Lutnick-te nen inkawmna hun an hmang nghal ang. In tlawhna hun hi prime minister Narendra Modi, leh president Donald Trump ten India leh US sumdawn tawnna, kum 2030 hmaa USD vbc 500-a tih pun an remtihna leh sector hrang hranga ram pahnihte hlawkna tel ve ve theihna tur Bilateral Trade Agreement(BTA), 2025 ral hmaa neih an tum bawhzuina tur a ni.

Kum 2023 khan India - US insumdawn tawnna, goods leh services hi USD vbc 190.08 (goods-ah USD 123.89 leh services-ah USD vbc 66.19) a kai a ni. Hemi kum veka India-in US-a bungrua a thawnchhuah chu USD vbc 83.77 hu tling pha in bungrua a chawk luh hlut zawn hi USD vbc 40.12 a ni thung. India-in US hnena services a thawn chhuah chu USD vbc 36.33 niin India chawkluh erawh USD vbc 29.86 chauh a ni thung.