Punjab CM-in Pakistan palai nena meeting tur a ṭhulh

Pakistan aṭanga kal firfiak nia hriatte'n Punjab Gurdaspur district-a Dinanagar police station an beih hnuah, Punjab Chief Minister Parkash Singh Badal chuan vawiina Pakistan High Commissioner Abdul Besit nena meeting an neih tur chu a ṭhulh.

Thawhṭanni khan ralthuam nena inthuam, firfiak pathumte chuan Indian Army uniform hain Gurdaspur district-a Dinanagar police station an bei. Firfiakte hian police station hi luh khungin mi pasarih an kaphlum a, police-te nen inkap zuiin darkar 11 zet an inkah hnuah firfiak pathumte hi kahhlum an ni. Firfiakte'n an kahhlumte hi senior police officer pakhat, home guard pathum leh civil mi pathum an ni.

Intellingence agency leh Punjab Police-te chuan GPS set an chhuina aṭangin firfiakte hian Pakistan-a Sha­kargarh bial aṭangin Pathianni khan ramri kanin Indian an rawn lut tiin an sawi. Mi pathumte hi Pakistan firfiak pawl, Laskhar-e-Toiba member nia rin an ni.

Police official chuan, "Firfiakte hian ram­ria luite rawn zawhin Bamiyal khua an rawn thleng a ni. Mahse Jammu bialah venhimna a khauh tih an hmuh avangin, Dinanagar khaw lam hi an pan ta niin a lang," a ti.

Chandigarh aṭangin Dinanagar police station-ah hian forensic expert tirh an ni tawh a, an ni hian firfiakte nihna dik tak hriat theihna turte an zawng dawn a ni. Forensic team hian firfiakte tawmna building pawh an enfiah tawh a, hei bakah hian police station panna atana car an hijack sak pawh an enfiah bawk ang.

Punjab Director General of Police (DGP) Sumedh Singh Saini chuan firfiakte hian AK-47 rifle leh China siam hand grenade te an keng, a ti. "An thawmhnaw leh an bungruate enfiah mek a ni," a ti.

Punjab-a pawikhawihna thlen dan hi mem­ber pali awmna team, Davinder Pal Seh­gal-a kaihhruaiin a chhui ṭan nghal a ni. Ramri an kaltlang theih dante chhui chian a ni ang.