Modi sorkarin dân hlui ṭhiah tum

Prime Minister Na­rendra Modi-a kaihhruai NDA sorkar chuan Thawh­ṭanni khan dân hlui­hlawn tawh 295 ṭhiah­na tur bill a pulut a, Parliament in hnihah pass nghal a ni.

Dân hluihlawn tawhte ṭhiahna tur bill, The Repealing and Amending (Fourth) Bill, 2015 hi Law Minister D V Sadananda Gowda-a'n a pulut a ni.

Dân hlui ṭhiah tur zingah hian Lepers Act of 1898, Foreign Recruiting Act 1874 leh Indian Tram­­ways Act, 1902 te a tel.

NDA sorkar hian Parliament in hnihah a hmain dân hlui ṭhiahna tur bill a lo pass tawh a, hemi hmang hian dân hluihlawn tawh 125 ṭhiah a ni.

Phar natna chu tihdam theih a nih laiin, Lepers Act hian phar natna veite chu mi anglo angin a ngai a, hei vang hian he dân hi a hmantlak tawh lo a ni.

Marriage acts leh Indian divorce acts-a provision ṭhenkhatah phar natna hi nupa inṭhen phalnaa ngaih a nih avangin Law Ministry chuan tun hnaia a ennawnah Lepers Act 1898 hi ṭhiah a rawt a ni.

Law commission chair­man Justice A P Shah chuan, "Phar natna chu tihdam theih a nih tawh a, damdawia enkawl thuai a nih chuan natna hlauhawm a ni lo. Damdawi hmangin kum 20 kalta khan mi maktaduai 15 chuang tihdam an ni tawh a, hetihlai hian phar natna chungchanga dân kan neih, Lepers Act chu mi nekchepna hmanruaah a hman theih thung a ni," a ti.

Law commission chuan phar natna veite chu inthlan chuh phalna pek bakah an dinhmun chawikan nan SC leh ST te hamṭhatna neih ang siamsak a rawt bawk.