Lalit Modi laka non-bailable warrant tichhuak turin ngen

Enforcement Directorate chuan nimin khan Mumbai sessions court-ah Indian Premier League (IPL) commissioner hlui, Lalit Modi-a lakah bail theih loh manna thupek tihchhuak turin a ngen.

ED chuan London-a tlanchhe mek, Lalit Modi hian sum tichingpena puhna thubuai an chhuinaah thawhpui intiam mah se, vawi tam tak an koh hnuah pawh a inlan duh loh avangin manna tur thupek hi tichhuak turin a ngen a ni.

Court chuan ED ngenna thehluh chungchangah thutlukna a la siam lo a, manna tur thupek hi a tihchhuah a remti a nih chuan Modi-a lakah hian Interpol red-corner notice tichhuakin, United Kingdom aṭangin India rama thawn kir tura ngen a ni ang.

Mumbai ED hian kum 2009-a BCCI-IPL media rights contract pek a nih danah thu zawhfiah turin Modi hi Mumbai-a a ukil kaltlangin hriattirna a pe a, mahse hriattirna an pek hi ni thum hnuah ED hnenah hian thawnkir leh a ni. Hemi hnu hian Directorate hian Modi hi a email address-ah hriattirna a thawn leh a, Mumbai-a a awmna hnuhnung berah pawh pek tel a ni bawk.

Agency chuan dan ang thlapa kohna pek a ni tih a sawi chungin, Modi hian Pathianni thleng khan kohna hi a la hmu lo tiin a sawi. Modi hian Directorate hnenah international process hmanga hriattirna hi pe turin a ti.

ED hian Modi leh BCCI-IPL official hluite lakah hian Foreign Exchange Management Act (FEMA) leh Prevention of Money Laundering Act hnuaiah thubuai 17 a siamsak a ni.