Ram hruaitute'n Abdul Kalam zahna an hlan

President hlui, Dr APJ Abdul Kalam chu Thawhṭanni khan Bethany Hospital, Shillong-ah a thi a, nimin khan Delhi-ah Indian Air Force thlawhtheihna hmangin phurh thlak a ni.

Abdul Kalam-a ruang hi Palam airport-ah Prime Minister Narendra Modi leh ram hruaitu pawimawh tak takin an lo hmuak a ni. Kalam-a ruang hi Delhi-a a chenna 10, Rajaji Marg-ah dahin, mi tam takin zahna an hlan.

Ram hruaitu leh mi pawimawh tak takin President hlui an ui thu hi an sawi.

Prime Minister Modi: "India chuan science leh technology lama dinhmun sang taka min hruaitu a mi ropui a chan ta. Ram mipuite, a bikin ṭhalai cho phurtu a ni. A hun tawp ni thlengin ṭhalaite nen hun an hmang a ni. India chuan scientist ropui, President mak leh ropui a chan ta a ni. A hun tawp thlengin a nuam tih ber, zirtirtu hna thawkin zirlaite kiangah a hun a hmang a ni."

President Pranab Mukherjee: "Ka ṭhianṭha tak, Kalam kan chan ta hi ka ui takzet a ni. A inngaihtlawmna leh nelawmnate chuan mitin ngainat a hlawhtir a, naupangte a hmangaihin ṭhalai cho phurna thu ṭha tak a sawi bakah, an kiangah hun a hmang fo a ni. India chuan a hunpum a ram tan leh ram mipuite tana hlantu, fapa ropui a chan ta. A dam laia mipuite president Dr Kalam chu a thih hnuah pawh a la ni chhunzawm zel ang."

Vice President Hamid Ansari: " Technology lam leh, zirtirtu leh hruaitu a nih anga ram tana a thawh­na hi hriatreng a ni tawh ang."

Congress President Sonia Gandhi: "President hlui hi APJ Abdul Kalam hi a ka ui takzet a, ram mipuite zawng zawng pawhin an uiin an hre reng ang. Thiamna hrang hrang nei mi ropui a ni a, ṭhalai chawk phurtu a ni. President a nih chhung pawhin a nelawmna leh finna avangin mipuite rilru a hneh hle a ni."

President hlui Kalam-a hriat­rengna a tan a official twitter account chu tihnun chhunzawm zel a ni dawn a, mahse a account hming hi 'In memory of Dr Kalam' tia thlak a ni. He account hi a thawhpui team-in an enkawl chhunzawm dawn a, a lehkhabu-a a thuziak-te tarlan a ni ang. President hlui hian follower maktaduai 1.4 chuang a nei.