EAM-in UK PM leh official-te a kawm

External affairs minister (EAM) S Jaishankar chuan Thawhlehni khan British sorkar official-te a kawm. EAM hian UK prime minister Keir Starmer a hmuh bakah, trade and business secretary Jonathan Reynold a kawm bawk. UK-a India consulate pahnih, Belfast leh Manchester-a mi a hawng dawn bawk.

EAM Jaishankar hian UK leh Ireland tlawh turin a zin chhuak a, UK tlawh hmasain vawiin hian Ireland a pan ang. A zinnaah hian thawh dunna ṭha siam turin ram hruaitute a kawm dawn a ni.

UK business secretary Jonathan Reynold leh EAM hian Free Trade Agreement (FTA) siamna tura inbiakna neih mek chungchang an sawi dun. India leh UK hian FTA chungchanga inbiakna hi thla hmasa UK Minister-in India a tlawh ṭumin official-in an ṭan thar leh a ni.

Prime Minister Starmer nena an inkawm chungchang chu Jaishanar hian X-ah tarlangin, ram pahnihten economy lama thawhdunna an neihte tih hmasawn zel dan turte leh mipuite inkar inpawhna ṭha a awm dan turte an sawi dun tih a sawi. Hei bakah hian Russia leh Ukraine inkar buaina chungchang an sawi dun bawk.

EAM-in UK a tlawh hi India-in Europe, Ukraine, Russia leh US-te inkara ṭanlam neih a tum loh thu a tarlan hnua zin a nih thu official chuan tarlang. Kar hmasaa PM Modi leh European Commission president Ursula van der Leyen-te in kawm khan Ukraine leh Russia buainaah hian remna leh muanna awmna tur chauh thlawp an tum thu a lo sawi ve bawk a ni.