India leh Belgium-in venhimna lama thawhdun rem ti

India-a 'economic mission' hmanga lo zin, Belgium deputy prime minister leh foreign minister ni bawk, Maxime Prévot leh prime minister Narendra Modi te chu Thawhlehni khan inkawmin, venhimna lama thawh dunna tur chungchang hi an sawi dun.

President Trump-an Ukraine an puihna tih tawp lailawk a tum hnuah, Belgium hian venhimna lam tih chakna atan India chu thawhpui a tum nia tarlan a ni. Hetih lai hian Russia leh Ukraine inkar buaina thleng mek karah India foreign secretary Vikram Misri chu Russia nena thawh dunna te sawi turin tunkar hian Russia-ah a zin dawn.

India nena defence lama an thawh dunna tih changtlunna turin Belgium chuan India-ah Defence Attache a dah dawn a, ram pahnihte hian kumin kumtawp lamah venhimna lama thawhdunna tur Memorandum of Understanding (MoU) an ziak dawn bawk niin Belgium defence minister Theo Francken chuan a sawi.

Venhimna lam tih hmasawnna tur kaihhnawihah hian Belgium-a John Cockerill Defence(JCD) leh Pune-a awm Electro Pneumatics & Hydraulics(EPH) Pvt. Ltd. chuan India rama tan turret siam tura an thawh dun tur thu an sawi. Hei bakah hian India Defence Research and Development Organisation (DRDO) leh Larsen & Toubro te siam tank-te chi, Zorawar tan turret an supply dun tawh bawk.