Gurdaspur-ah firfiakte'n police station an bei

Nimin zing khan Pakistan ramri bul, Punjab Gurdaspur district-a Dinanagar police station chu sipai uniform-a inthuam firfiak pali-in an bei. Firfiakte hian mi pasarih, police officer pali leh civil mi pathum an kaphlum.

Firfiakte hi police station chhungah tawmin pawn lam aṭangin security force-te an bei let ve thung. Dinanagar police-te pui tur hian sipaite tirh an ni bawk. Firfiak zinga pahnih chu an kaphlum tawh a, police station chhunga buildingah midang pahnihte chu an la awm a, nimin tlai dar nga vel khan security force-te chuan firfiakte hi an vaiin an kaphlum a ni. Firfiakte nena inkahnaah hian Punjab police-a superintendent of police (detective) Baljeet Singh a thi niin IG Gaurav Yadav chuan a sawi.

Firfiakte hian police station an beih hma hian kawng sira eitur zawrhna dawr chu an bei a, dawr bula Maruti 800 chu kapin a driver an kaphliam a, a motor hi an laksak zui bawk. Hemi hnu hian Dinanagar biala bus pakhat, Chandigarh pana tlan chu an bei a, silaia pawng kahin mi paruk an kap hliam. Dinanagar police station an luhkhung hma hian station bula community health centre an bei leh a, he buildingah hian police chhungkaw ṭhenkhat an cheng tel a ni.

Police station beitu firfiakte bei let tur hian Punjab Police hnuaia Special Weapons and Tactics (SWAT) team tirh an ni a, Army-in a puih bakah Jammu and Kashmir police-te pawh tirh an ni bawk.

Media report ṭhenkhat chuan firfiakte hi Pakistan-a Narowal aṭanga kal an ni a, firfiak pawl Lashkar-e-Toiba emaw, Jaishe-e-Mohammad pawl emaw mi leh sate an nih rin a nih thu an tarlang.

Pawikhawihna a thlen hnu hian Prime Minister Narendra Modi chuan a minister hmuin, thil awmdan leh hmalak dan turte an sawiho.

Home Minister Rajnath Singh pawhin Boarder Security Froce (BSF) director general, DK Pathak pawh a be nghal a, Gurdaspur-a pawikhawihna thleng vang hian India leh Pakistan inri-na laite pawh uluk zawka veng turin a hrilh a ni. Punjab leh Jammu and Kashmir-ah pawh venhimna tihkhauh nghal a ni bawk.

Rajnath Singh hian Punjab Chief Minister Parkash Singh Badal pawh biain, sorkar laipuiin a puih zel tur thu a hrilh bawk.

Minister chuan National Security Advisor Ajit Doval leh Union Home Secretary L C Goyal-te pawh biain, Gurdaspur-a firfiakte pawikhawihna thlen chungchang hi an sawi a, Punjab DGP pawh a be bawk a ni.

Nimina Parliament inkhawmah pawh Gurdaspur-a pawikhawihna thleng chungchang hi sawichhuah a ni a, Parliamentary Affairs Minister Venkaiah Naidu chuan he thil thleng hi politics lama kailut lo tur leh, firfiakte do letna kawngah party tinte chu lungrual taka aw khat chhuah turin a ngen. Home Minister Singh chuan Gurdaspur-a thil thleng chungchangah vawiin hian thuchhuah siam a tum thu a sawi.

Parliament inkhawmah hian Congress hruaitute pawhin Gurdaspur-a firfiakte pawikhawihna thlen an dem thu an sawi a, Congress hruaitu Ahmed Patel chuan mi dawihzepte thiltih a ni tiin, Mallikarjun Kharge-i chuan firfiakte doletna kawngah India ram mipuite chu an ṭangrual zel dawn a ni, a ti.