SC-in Jaya-i hnenah hriattirna pe
Supreme Court chuan Tamil Nadu Chief Minister J Jayalalithaa-i hnenah nimin khan hriattirna pein, Karnataka High Court-in thiam a chantir chungchanga Karnataka sorkar petition thehluh chu chhang turin a hriattir.
Jayalalithaa-i hi a sum lakluh phu loa hausaa puhin eiruk thubuai siamsak a ni a, Bengaluru trial court-in thiam loh a chantir hnuah court sang zawkah a appeal a, Karnataka High Court-in a thubuai hi a ngaihtuah hnuin amah leh a thurualpuia puhte chu thiam a chantir a ni.
Karnataka High Court-in Jaya-i hi thiam a chantirna ngaihtuah ṭha tur hian Karnataka sorkar chuan Supreme Court-ah petition a thehlut ve leh thung. Petition thehluhah hian High Court hian Jaya-i hausakna a chhut dan chu a dik tawk lo tiin a sawi.
Karnataka High Court hian thubuai siamsaknaa kum 1991-96 chhunga Jaya-i hausakna, cheng vaibelchhe 66.5 hu nia sawi chu cheng vaibelchhe 2.82 zawk tiin a sawi a, hei hi a sum lakluh aia 10% tlem a nih avangin eirua puhna thubuai hi a tihtawp sak a ni. Mahse state sorkar chuan HC thil chhutsual dan hi hriatchian a nih hnuah, a thil neih punna hi 8.12% ni loin, 34.50% zawk a ni, a ti.