Delhi Race Course-ah loneitute hriatrengna siam phut

Aam Aadmi Party (AAP) hruaitu hlui, Yo­gendra Yadav, Pra­shand Bhusan leh Anand Kumar-te kaihhruai, Swaraj Abhi­yan pawl chuan nimin khan Delhi Race Coure pawnah lungawi lohna an lantir. Delhi Race Course hi Delhi Race Club tia sawi a ni bawk.

Swaraj Abhiyan hruai­tute chuan Delhi Race Course ram chu kum 1912 khan lonei­tute hnen aṭangin van­tlang tana hman tur chhuan­lama laksak an ni, an ti. Club hnenah hian ram hi hman hawh tirin, kum 1998 khan an hman phalna hi a tawp tawh a, mahse tun thlengin an la awm zui zel a ni, an ti.

Delhi Race Club chu an awmna ram aṭanga chhuah tir a, a hmunah hian loneitute hriat­rengna hmun siam zawk turin an phut.

Yogendra Yadav chuan, "Lo­­neitute ram laksaka Race Club dah tluka loneitute dik­na palzutna a awm lo a ni," tiin, club hnenah pawh insawn­chhuak tura ngenna an thehluh tawh thu a sawi. An thil phut tihhlawhtlinna atan ni kua hun an nghak ang a, hemi chhunga hma lakna a awm loh chuan na zawka nawr an tum thu a sawi bawk.

Abhiyan chuan thu­chhuah a siamah, kum 1912-a an ram laksak an nih dawn khan a ram neitu, loneitute khan zâng­nadawmna atan ram acre khatah Rs 1,600-2,400 an phut a, mahse sorkar chuan acre khatah Rs 15-35 chauh a pe a ni, a ti.