J & K-a cheng ni loten ram lei thei tawh dawn

Ministry of Home Affairs (MHA) chuan Jammu and Kashmir-a dan hman lai eng emaw zat siamṭhain,  pawn lam miten ram (urban land and immovable property) an lei theihna tur Jammu and Kashmir Reorganisation (Adaptation of Central Laws) Third Order, 2020 a tichhuak. 

MHA in hriattirna a tihchhuahah hian union territory ni ta, J&K-a cheng nghette chauhin ram an nei thei nia tarlanna, Jammu and Kashmir Development Act-a Section 17-a 'parmanent resident of the state' tih chu a paih a ni. 

J&K tana special status pekna, nikum August 5-a sorkar laipuiin a tihtawp tak, Article 370 leh Article 35-A hman a nih lai chuan J&K-a cheng nghet lo tam ram an lei ve thei lo a ni.  MHA-in hriattirna a tihchhuah tharah hian central law pathumte chu J&K-ah hman a ni tawh dawn a, J&K-in ama bila law a neih sa 12 chu ṭhiah a ni a, a dang 14 chu siamṭhat leh hman loha dah rih a ni ang. 

 

MHA-in J&K chung changa hriattirna a tihchhuah hi hman nghal tur a ni. Mahse ram lei phalna hian thlai chinna ram, agriculture land erawh a huam tel lo. Lieutenant Governor Manoj Sinha chuan buh leh thlai chinna ram chu loneitute tana zuahsak a ni a, pawn lam mite tan lei theih a ni dawn lo, a ti. 

Sorkar laipuiin J&K ram humhalhna dan siamṭha a, pawn lam mite tana ram lei a phalsak chungchang chief minister Omar Abdullah chuan na takin a sawisel zui nghal. He dan siamṭhat hi pawm theih a ni lo tiin, J&K chu hralhin a awm mek a ni, a ti. A cheng nghet ni lote tana ram lei phalsak chuan J&K-a ram neitu, dinhmun harsa zawkten an tawrh phah ngei dawn niin a sawi. 

Eptuten ṭangrual pawl an din thar, People's Alliance for Gupkar Declaration (PAGD) thupuangtu Sajad Lone pawhin, dan siamṭhat chuan  Jammu, Kashmir leh Ladakh-a cheng nghette dikna chanvo neihte a hlih sak nia sawiin, MHA thupek chu 'phatsanna' a ti. Ṭangrual pawl chuan kawng hrang hranga Jammu,Kashmir leh Ladakh chhiatna tura beitute chu theihtawp chhuaha an beih let zel tur thu a sawi bawk.