Delhi-ah tiam chin awm loin school khar

Delhi deputy chief minister Manish Sisodia chuan Delhi-a school zawng zawng chu tiam chin awm loa khar chhunzawm vek an ni dawn tih nimin khan a sawi. 

Sisodia chuan nimina online press conference a neihah hei hi puangin, nu leh pate pawhin school hawn chu an la thlawp lo tih a sawi a ni. 

Delhi sorkar chuan a hmain October 31 thleng school khar a ni dawn tih a lo puang tawh a ni. "State leh khawpui danga school hawn tawhnaah naupang zingah Covid-19  kai an pung chho zel a, hei vang hian Delhi-a school-te chu  hawn rih loh kan rel a ni. Thupek dang siam a nih leh hma chuan school-te hi khar chhunzawm zel an la ni ang," a ti. 

Ram chhung hmun ṭhenkhatah school hi hawn ṭan a ni chho mek a, mahse a tam zawkah chaun Class 9-12 chin chauh hawn niin, zirlaite pawh kal vek tura tihluih an ni lo a, nu leh paten an remtihpui chauhin kal tura tih an ni.