Bihar Assembly inthlan thawh khatna nei

Bihar Legislative Assembly inthlan thawh khatna chu nimin khan neih a ni. 

Inthlan thawh khatna hi Assembly bial 234 zinga bial  71-ah neih a ni a, candidate 1066 awmin an zinga 114 chu hmeichhia an ni. Gaya town bialah candidate an tam ber a, mi 27 an awm a ni. Vote nei vaibelchhe 2.15 an awm a, an zinga mipa vaibelchhe 1.12 leh hmeichhia vaibelchhe 1.01 bakah third gender 599 an awm bawk. Vote thlakna tur polling station 31,371 siam a ni. 

Inthlan thawh hnihna hi assembly bial 94-ah November 3-ah neiin, a thawh thumna leh a tawpna ber tur chu bial 78-ah November 7-ah neih a ni ang. Vote tlate hi November 10-ah chhiarin result puan nghal a ni ang. 

Bihar hi India rama hripui a len hnua assembly inthlan­pui neihna hmasa ber a ni. Hri leng laka invenna turin Election Commission chuan kaihhruaina  hrang hrang a siam a, vote thlak tura mipui pungkhawm tam tur venna atan vote thlak theih hun pawh pawhsei a ni. 

Polling booth pakhatah vote thlak thei zat, mi 1,600 chin tih pawh 1,000 chinah tihhniam a ni. Covid-19 kaite pawhin vote an thlak ve theihna turin ruahmanna te siam niin, voter dangten vote an thlak vek  hnuah an thlak phalsak an ni.