Kargil Vijay Diwas-ah martar-te zahna hlan

Nimin khan Kargil indonaa India-in hnehna a chan champha, Kargil Vijay Diwas hman a ni a, he indonaa ram tana nunna hlantu martar-te zahna an hlan.

Kum 1999 May thla aṭang khan Kargil-ah Pakistan leh India sipaite an indo ṭan a, thla hnih chhung a awhin July 25 khan India sipaite chuan hnehna changin indo hi a tawp a ni. Kargil indonaah hian India sipai 490 an thi.

Defence Minister Manohar Parrikar leh service pathum hotu, Army chief General Dalbir Singh Suhag, Air Chief Marshal Arup Raha leh Navy chief Admiral RK Dhowan-te chuan New Delhi-a Amar Jawan Jyoti-ah sipai martar zahna hlanin pangpar an dah.

Nimin vek khan Kargil Vijay Diwas pual hian marathon buatsaih a ni bawk a, marathon neih lai hian sipai bangte chuan sorkar laipui chu One Rank One Pension (OROP) policy hmang tura an phutna an lo lantir bawk.

Kargil war hi Jammu and Kashmir-a Kargil district leh Line of Control (LoC) a India leh Pakistan sipaite inbeihna a ni a, India sipaite beihpui thlakna hi Operation Vijay tia vuah a ni. He indonaa sipai thi zinga eng maw zat chu an thih hnuin huaisen lawmman pek an ni. Kargil khua hi Srinagar aṭanga kilometre 205 vela awm a ni.