PM-in a thusawi tur atan rawtna thehluh turin a sawm

Prime Minister Narendra Modi chuan nimin khan thla tina radio-a hun a hman, 'Mann Ki Baat' programme a hmang leh a, hetah hian kumin Independence Day-a thu a sawi tur atana rawtna neite chu thehlut turin a sawm nghal.

Nimina PM-in radio-a hun a hman hi a ṭum sawm-na a ni a, Kargil indonaa ram tana nunna hlan, martar-te zahna a hlan nghal a ni. PM chuan indona chu ramri-ah chauh neih a ni lo a, thingtlang leh khawpui tinte pawhin ram tana beitute tan hian theihtawp an lo chhuah vek a ni, a ti.

Loneitu-in a ram nena inzawmna a neih tlat ang bawkin, sipai pawh a ram nen an inzawm tlat a ni a ti a, mahni nunna pawh ngai pawimawh thei loa ram tana beitute chu zahna chibai a buk tih a sawi.

Independence Day, August 15-a lawmna neih tura a thusawi turah, mipui lam aṭanga rawtna ṭha tak nei an awm chuan thil lawmawm tak a ni dawn tih PM chuan a sawi. Kum 2014, July 26-a MyGov platform hawn dawn pawh khan a thusawi tur chungchangah mipuite lam aṭangin rawtna an neihte thehlut turin a lo sawm tawh bawk.