Kum 14 chhungin millionaire 61,000 pem chhuak

Kum 14 kalta chhung khan India ram aṭangin mi hausa, high net worth individual (HNWI), millioniare 61,000 chu ram dangah an pem. Heng mite hi chhiah, security leh fate lehkha zirna lam avanga pem an ni.

New World Wealth leh LIO Global joint report-ah hemi chungchang hi tarlan a ni a, kum 2000-2014 chhunga mi hausa pem chhuak tamna ber chu China niin India-in a dawt a ni. Hemi hun chhung hian China mi hausa pem chhuak chu 91,000 an tling.

India mi hausa pemchhuakte hian UAE, UK ,US leh Australia-te an pan ber a, China mi hausate hian US, Hong Kong, Singapore leh UK-te an pan thung. Kum 14 chhunga mi hausa pem luh tamna ber ram chu UK niin, mi nuai 1.25 vel an lut a ni.

HNWI hian an chenna hmun hlutna chhut tel loa, dollar maktaduai khat hu nei chin a huam a ni.