Salman Khan-a'n Memon thlavang a hauh sak

Lemchan thiam, Salman Khan chuan kum 1993-a Mumbai khawpui ṭum eng emaw zat bomb tipuaka puh a nih avanga thiam loh chang, July 30-a khaihlum tura tih Yakub Memon thlavang hauh zawnga thu a ziah chuan sawizui a hlawh hle.

Salman Khan hian nimin khan twitter-ah Yakub Memon chungchang hi ziakin, "Khaihlum tur chuan 'tiger' zawng rawh u. A unaupa ni loin amah zawk hi khaihlumna hmunah chuan hruai rawh u," tiin a ziak. Tiger Memon hi Yakuk Memon-a unaupa a ni a, Mumbai khawpuia bomb tihpuah a nih hnu hian a bibo nghal a, tunah hian Pakistan ramah a awm mek nia rin a ni. Mumbai khawpuia bomb puak vang hian mi 257 an thi a, mi 1,400 chuangin hliam an tuar a ni.

1993 bomb puak thubuaia special public prosecutor, Ujwal Nikam chuan Salman Khan-a thuziak hi a sawisel nghal a, "Salman Khan thuziak hi court thutlukna zah lohna a ni. Twitter-a follow-tute hnenah Yekub Memon hi pawisawi lo angin a lantir a ni. A thusawi finfiahna tur hi eng nge a neih?" tiin a zawt let.

BJP thupuangtu, Shaina NC pawhin Khan-a thuziak hi sorkarin firfiaka chetna a dona beih letna anga a ngaih thu a sawi. Yakub Memon chuan kum 1993-a pawikhawihna rapthlak tak thlenga a bul tumtu ber a ni a, hrem ngei a phu a ni, a ti. Party hrang hrang hruaitute pawhin Salman Khan thuziak hi an dem thu an sawi.

Salman Khan-a pa, Salim Khan chuan a fapa thuziak chu thu awmze nei lo a ni tih sawiin, lo lak thutak sak lo turin mipuite a ngen. Salim chuan a fapa ngaihdan chu a thlawp loh thu a sawi bawk.