Land bill hnukdawk turin TMC-in ngen

West Bengal-a rorellai, Trinamool Congress (TMC) party chuan Joint Committee of Parliament on the Land Acqui­sition Bill hnenah report theh­lutin, BJP kaihhruai NDA sorkarin Land Acquistion Bill a siam chu hnukdawk turin a ngen.

Lok Sabha-a seat 34 nei, TMC hian NDA sorkar hi bill eng maw zat a siamah a thlawp a, heng zingah hian Goods and Services Tax (GST) bill pawh a tel. Mahse Land bill chungchangah hi chuan a thlawp thei dawn lo tih sawiin, hnuk­dawk zawk turin a ngen a ni.

Odisha Chief Minister, Biju Janata Dal (BJD) hotu Naveen Patnaik pawhin com­mittee chairman, BJP MP SS Ahlu­walia hnenah lehkha a thawn bawk. BJP hian land bill putluh tum hi a duh loh thu a lo sawi tawh bawk.

Congress leh Left party-te pawhin vawiin hian land bill siam danglam hi an thlawp loh thu ziakin an thehluh rin a ni bawk.

NDA sorkarin land bill a siam danglam hi eptu party-te bakah, NDA hnuaia BJP thawhpui party ṭhenkhat pawhin an dodal a ni. Dodalna a tam avangin sorkar laipui chuan state sorkar-te chuan anmahni pual ṭheuha land acquisiton law siam tir mai te pawh a rawt tawh a ni. Mahse he rawtna hi kaltlangpui a nih dawn pawhin, Joint Committee-in a enfiah mek land bill hi sorkarin a siamṭhat leh a ngai ang.