Session ni li-na: Member-te in au buai chhunzawm zel

Parliament Monsoon Session ni li-na chu nimin khan neih chhunzawm a ni a, mahse a hma ang bawkin rorellai leh eptu party member-te in au buaiin, rorel thei loin inkhawm tihtawp a ni leh.

Eptu member-te hian rorel inkhawm ṭan a nih aṭangin Lalit Modi leh Vyapam scam chung­chang sawichhuakin, heng thila inhnamhnawh, hmingchhiatna nei BJP hruaitute chu bang turin an phut. Bang tura an phutte hi External Affairs Miniser Sushma Swaraj, Rajasthan Chief Minister Vasundhara Raje leh Madhya Pradesh Chief Minister Shivraj Singh Chouhan-te an ni.

Nimina Lok Sabha inkhawm­ah chuan rorel ṭan a nih veleh eptu member-te chu Well-ah an kalkhawm nghal a, hei vang hian minute reilote hnuah Speaker Sumitra Mahajan chuan inkawm a titawp nghal a ni.

Rajya Sabha-ah pawh rorel theih loha member-te an au bengchhen avangin inkhawm tihtawp a ni bawk.

Thawhṭanni-ah session hi chhunzawm leh a ni ang.

Rorel inkhawm tihtawp a nih hnu hian BJP member-te chuan Congress Chief Minister-te chu ei­ruknaa inhnamhnawihah puh letin, Parliament House pawn lamah lungawi lohna an lantir ve leh a ni.