AAP-in PM tihelna poster an tar

Delhi-a rorel lai, Aam Aadmi Party (AAP) sorkar chuan khawpui chhung hmun hrang hrangah poster tarin, Prime Minister Na­ren­dra Modi chu khaw­pui enkawl hna thawh phalsak turin an ngen.

Sorkar laipui chuan Delhi sorkar rorelnaa inrawlhah puhin, Anti-Corruption Branch (ACB) leh Delhi Commission for Women (DCW) tibuaiah an puh a ni. An poster tarah hian, "Prime Minister, khawngaih takin Delhi sorkar hi hna thawh tir rawh. Delhi sorkar hian ṭha takin hna a thawk mek a ni," tihte an ziak.

Poster an tar hma hian Delhi Chief Minister Arvind Kejriwal-a chuan Lieutenant Governor Na­jeeb Jung chu lehkha a lo thawn tawh bawk. Najeeb Jung hian DCW hotu thar atana Delhi sorkarin Swati Maliwal a ruat chu a hnawlsak a, a office pawh a hriat lohin a lo kalh­tir nia sawi a ni. CM Kejriwal chuan LG Jung hian prime mi­nister thupek angin DCW chu hnathawk thei loa siam a tum a ni, a ti.

Delhi-a AAP sorkar chu hnathawk theilo tura siam tumah sorkar laipui chu puhin, Delhi Deputy Chief Minister Manish Sisodia chua, "Delhi sorkar hnuaia anti-corruption branch chuan chak takin hna a thawk a, hlawhtlinna a hmu chho ṭan tihah sorkar laipui aiawh chuan dan kalhin hotu thar tur a rawn ruat ringawt a ni," a ti. Hetianga sorkar laipui a inrawlh chhan hi ACB chuan Union Minister pakhat lakah FIR thehluh a tum tia thuthang a awm vang tiin a sawi.