Railway Police-te'n rel aṭangin Fencing player an namthla

National level fencing player, Hoshiyar Singh chu Mathura bulah rel tlan lai aṭangin Government Railway Police (GRP) te'n an namthla a, a hmunah a thi nghal.

Hoshiyar Singh hi a chhungte nen Mathura aṭanga an khua, Kasganj-a haw tum an ni. Rel-a an chuan hnu hian a nu leh a nupui chu hmeichhe pindanah a ṭhuttir hnuin, amah hi pindan dangah a ṭhu a ni. A nupui hi a damsam loh avangin enfiah turin a hnuah a va kal leh a, hei hi railway police-te chuan lo dangin, hmeichhe pindana a luh dawn chuan Rs 200 pe turin an lo phut a ni.

Singh hian GRP-te pawisa phut chu a pek duh loh avangin an inhnialbuai zui a, railway police-te chuan man betin rel tlanlai aṭang hian an namthla a, Singh hi leiah tla thla mai loin a rel-ah hian a tang a, a thi zui ta nia sawi a ni.

Hoshiyar Singh hian kum 2005 khan fencing vunder-17 championship-ah bronze medal a lo la tawh a ni. A chhungte chuan rel aṭanga namthlatu railway police-te chu tualthah thubuai siamsak turin an phut. Police lakah hian FIR pawh an thehlut tawh a, mahse police lam chuan Singh hi chesualin rel aṭang­in amahin a tla tiin an sawi thung.