Parliament session Rorel thei loin inkhawm titawp leh

Parliament Monsoon Session ni thumna, nimina neihah member-te an in auh buai leh avangin rorel thei loin inkhawm tihtawp leh a ni.

Parliament in hnih, Lok Sabha leh Rajya Sabha-ah chuan vawi tam tak eptute'n inkhawm an aubuai a, sorkarin thil ngaihtuah tura a chhawpte pawh sawiho thei loin an ṭin leh a ni.

Nimin rorelnaa ngaihtuah leh pass tura sorkarin a lo ruahman lawkte chu

Lok Sabha

- The Repealing and Amending

(Third) Bill, 2015

- The Delhi High Court

(Amendment) Bill, 2015

- The Scheduled Castes and the Scheduled Tribes (Prevention of Atrocities) Amendment Bill, 2014

Rajya Sabha

The Juvenile Justice (Care and Protection of Children) Bill, 2015.

Congress party kaihhruai, eptu pawlte chuan eiruk leh thil dik lo tihnaa inhnamhnawiha puh, External Affairs Minister Sushma Swaraj bakah Rajasthan leh Maharashtra-a BJP chief minister pahnihte chu ban an phut chhunzawm zel. Sorkar lam chuan eptute'n buaina an siamna chhan, Lalit Modi leh Vyapam scam chungchang chu sawiho tura a inhawn thu sawi mah se, eptu lam hian BJP hruaitu pathumte hi ban phawt turin an phut a ni.

Nimina Lok Sabha inkhawmah BJP chuan Congress party chu an party president, Sonia Gandhi-i makpa, Robert Vadra-a'n Facebook-a a thil post chung­changah an bei let ve bawk. July 21-a session ṭan a nih hma khan Vadra hian a Facebook-ah, "Parliament ṭan a ni leh a, an political tactic hrang hrangte an hmang ṭan leh ta. India mipuite hi bum mai mai theih an ni tawh lo. Hetiang hruaitute'n India an kaihruai hi chu a pawi hle a ni," tiin a ziak a, hminghmerhin NDA sorkar emaw, BJP hruaitu emaw te ziahlan erawh a nei lo.

BJP member Prahlad Joshi chuan Vadra-a thu post hi Parlia­ment member-te hmusitna leh ngaih­nepna lantirna a ni tiin a sawi a, Vadra chungchang hi Privileges Committee of Parliament hnena thlen a duh thu a sawilang bawk.