DCW hotu office an kalh sak

Delhi Lieutenant Governor Najeeb Jung-a'n Delhi sorkarin Delhi Commission for Women (DCW) hotu atan Swati Maliwal a ruatna a hnawl hnuah, nimin khan a office an kalh sak a, name plate pawh an dahbo sak.

Delhi-a AAP sokar chuan DCW hotu thar atan kum 30 mi, Maliwal hi a ruat a, mahse LG Jung chuan ruat a nih dawn hian sorkarin a rawn lo nia sawiin a hnawlsak a ni.

Maliwal-i chuan nimin khan LG hian a office chu bia-in, office kal lo tura a hrilh thu leh, a office pawh kalhsak a ni tih a hrilh tiin a sawi. Hei vang hian nimin khan office hi a kal lo a, mahse he thil thleng vang hian a bang mai dawn lo tih a sawi. Hmeichhiate dikna chanvo humhalh sak turin theihtawp chhuah zel a tum thu sawiin, LG office nena an buaina chu chinfel thuai a nih a beisei thu a sawi bawk.

Hetihlai hian LG office chuan DCW office kalh tura thu a pek loh thu sawiin, Jung hian Maliwal-i hi a bia a, a staff-te erawh chuan tumahin an be lo tiin a sawi.

Delhi Chief Minister Arvind Kejriwal-a chuan LG hian Delhi sorkarin DCW hotu a ruatna a pawm loh thu a hrilhnaah, "Keimah hi Delhi sorkar chu ka ni" tia a sawi thu a tarlang. Hei vang hian CM hian LG hnenah lehkha thawn letin, "Eng­tinge mimalin sorkar ka ni a intih theih? Hetiang hi a thleng zel a nih chuan Delhi chu dictator hnuaiah a la lut mai dawn a ni," a ti.