PM hian mipuite a phatsan a ni : Rahul Gandhi

Congress Vice President Rahul Gandhi chuan Prime Minister Narendra Modi chuan kum 2014 inthlanpuia thuneihna a chan theihna atana vote tu, mipuite a phatsan tawh tiin a sawi.

Rampumin a buaipui mek, BJP hruaitu lute'n dan bawhchhetu Lalit Modi an ṭanpui dan leh, Madhya Pradesh-a Vyapam scam chungchangah PM Modi chu tun thlenga a la ṭawng chhuah lo avangin an aiawha thlangtu, mipuite a phatsan a ni, a ti.

Rahul Gandhi chuan, "Mipuite chuan PM Modi chu rintlaka an ngaih avangin an thlang a, mahse a minister leh an party hruaitute thil tih dik loh chungchangah engmah a sawi chhuah duh loh avangin phatsan niin an inngai tawh a ni," a ti.

Vyapam scam kaihhnawihah mi 40 chuang an thi tawh a, hemi chungchang hi PM hian vawikhat pawh a la sawi lo a, "Hetiang boruak thleng mekah nghawih chuh tlat hi a hun tawh lo a ni," tiin Rahul chuan a sawi.