BJP leh UPA sorkar-te hi an danglam lo: Prakash Karat
Communist Party of India (Marxist) hruaitu leh National Politburo member, Prakash Karat chuan centre-a BJP sorkar chu sorkar hmasa, UPA sorkar nen eirukna leh mi hausa leh thiltitheite duhsakna lantirna lamah an inang reng tiin a sawi.
Vantlang inkhawma thu a sawiah, Karat chuan BJP chuan eirukna laka fihlim sorkar siam tiamin thuneihna an chang a, mahse kum khat lek chhungin eirukna leh hlemhletna hrang hrangah an mualpho tawh a ni, a ti.
CPI-M hruaitu chuan centre-a BJP kaihhruai NDA sorkar eiruknaah AIADMK leh DMK party-te an ngawi tlat chhan a zawt bawk. Dik lo taka thiltih thlengte chu Supreme Court enpuina hnuaiah dik leh felfai taka chhui a nih theihna atan External Affair Minister Sushma Swaraj-i leh Rajasthan leh Maharashtra-a BJP chief minister pahnihte chu bang turin a phut.
Karat chuan, "CPI-M leh Left party-te chauh hian eiruk chungchangah midangte kan bei let thei a ni. CPI-M rorelna state pathum- West Bengal, Kerala leh Tripura-ahte eirukna a thleng ve lo," a ti.
Thla 14 kalta chhung khan BJP chuan mi retheite dikna chanvo chu Land Acquistion bill, Labour welfare law siam danglam leh Mahatma Gandhi National Rural Employment Guarantee Scheme nasa taka tihtlem hmangin a bei a ni, tiin CPI-M hruaitu chuan a sawi bawk. BJP in thuneihna a chan hnuah beisei angin ṭhalaite tan hna thar siam a ni lo a, loneitute an kut hah man pawh a pe lo a ni, a ti. CPI-M chuan thingtlang hmun hrang hranga loneitute leh kut hnathawkte thlawp-na lantirin campaign neih a tum thu a sawi bawk.