Punjab-ah ruihhlo tawlhtu lian man

Punjab Police-te chuan khawvel pum huapa ruihhlo tawlhna a inhnamhnawih avanga US intelligency service, Federal Bureau of Investigation (FBI) in man tuma a zawn mek, international drug trafficker, Shawn Bhinder tia hriat lar Shehnaz Singh chu nimin khan an man.

Shawn Bhinder hian Colombia aṭanga United States leh Canada-ah tawlh luh a nihnaah a khaipa ber zinga mi nia sawi a ni ṭhin. FBI hian February 26 khan a ruihhlo tawlh luh tam tham hi manin a thawhpui pali - Amrit tia hriat Amritpal Singh , Cheema tih a hriat Amritpal Singh , Romy tiha hriat Takdir Singh , Sabi tih a hriat Sarbsit Singh , leh Franco tiha hriat Fernando Valladares te chu an man tel bawk. Bhinder erawh chuan man hi pumpelhin tun thla tir khan India-ah a rawn tlanchhia a ni. FBI-in ruihhlo an man zingah hian methamphetamine kg 391, cocaine kilogram 109 telin hei bakah hian silai pali an man tel bawk.

Bhinder hi India ram a rawn lut hnuah Punjab police-te chuan zawnchhuah tumin hma an la nghal a, nimin khan Ludhiana-ah an man thei ta a ni. Punjab Director General of Police (DGP) Gaurav Yadav chuan "He beihpui thlak hi Punjab Police-te'n ruihhlo tawlhruk leh buaina siam ṭhin te laka zero-tolerance an kalpui mek tilangtu a ni. Punjab hi ruihhlo tawlh rutu leh misualte tan hmun him a nih loh nan international law enforcement agency-te nen thawhhona ṭha tak kan nei chhunzawm zel a ni," a ti.