69th CSW hmang turin Union Minister Devi a zin

Women and child development minister Annpurna Devi chu New York-a Commission on the Status of Women (CSW) vawi 69-na hmang turin a zin. Thu a sawi bakah Ministerial Roundtable-ah a tel dawn a ni.

CSW vawi 69-na hi United Nations Headquarters, New York-ah nimin aṭang khan ṭan niin, March 21 thleng a awh ang. He session-ah hian hmeichhiate dinhmun chawikanna leh intluk tlanna lama hmasawnna hrang hrang zir ho a ni ang.

Minister Devi hian CSW session-ah hian India ramah prime minister Narendra Modi kaihhruaina hnuaia hmeichhiate dinhmun chawikan a nih dante, sorkarin hmeichhia te tana hmalakna a neih hrang hrangin nghawng a neih dangte a sawi dawn a ni. Hun hman karlakah minister Devi hian Beijing Declaration leh 2030 Agenda for Sustainable Development kalpui dan tur leh chak zawka kalpui dan tur sawihonaah pawh a tel dawn bawk.

India sorkar leh UN Women thawkdunin an buatsaih, March 12 a high-level engagement-ah Minister Devi hi khualṭha a ni dawn a, he hunah hian khawvel hruaitu hrang hrang, dan siamtu, financial leh digital huanga hmeichhe dinhmun chawikanna kawnga mi thiambik te nen in kawmna hun an hmang ang.

Annpurna Devi hian a zin chhung hian New York-a India mi leh sa awm te nen in kawmna hun an hman dawn bakah, International Women's Day den chhenin India-in hmeichhia leh mipa intluktlanna, leh hmeichhia te dinhmun chawisanna kawnga hlawhtlinna a hmuh tawhte sawi hona hun an hmang nghal dawn a ni.

Kumina session-ah hian member state, intergovernmental organisation, civil society, leh private sector aiawhte an tel bawk. CSW hi UN Economic and Social Council (ECOSOC) hnuaia commission peng pakhat niin a thil tum ber chu khawvel huapa sorkar hrang hrangte chu hmeichhe dikna leh chanvo bakah, intluktlanna an neih theihna tur hma lak a ni.