Parliament session: Lalitgate leh Vyapam vangin rorel thei lo

Parliament Monsoon Session ṭhutkhawm ni hnihna, nimina neihah chuan Lalitgate leh Vyapam scam avangin Lok Sabha leh Rajya Sabha chu rorel thei loin tihtawp a ni.

BJP hruaitu ṭhenkhat, dan bawhchhetu ILP hotu hlui Lalit Modi ṭanpuitute chu eptute'n bang turin an nawr chhunzawm zel. Lalit Modi chungchang, Lalitgate tia sawi hi sorkarin eptute nen sawiho a inpeih thu sawi mah se, eptu ṭangrualte chuan Modi-a ṭanpuitute chunga action lak pawh an phut.

Lalit Modi a ṭanpui avanga eptute'n bang tura an phut zingah hian External Affairs Minister Sushma Swaraj-i pawh a tel. Swa­raj-i hian an puhna chhanletna atan hian lungalhthei laihchhuah phalna pek chungchanga dik lo taka kalpuina, coal scam-a inhnamhnawih Santosh Bagrodeia passport dilpuitu, Congress hruai­tu hming a puang dawn tiin nimin zing khan a lo vau lawk a ni.

Nimina rorel inkhawma Swa­raj-i'n Lalit Modi chung­changah insawifiah a tum chu eptu lam chuan an ngaithla duh lo a, beng­chheng siamin minister chu bang turin an nawr chhunzawm a ni.

Congress Party MP-te chuan an banah puan dum hrengin, thuziak te an keng a, Lok Sabha Speaker Sumitra Mahajan chuan House chhunga an chet dan avang chuan an chunga action lakah a vau.

Eptute'n thuziak an kenah hian PM chu a minister-te hming­hliauna neih chungchangah ngawi reng tawh lo tura an phutna thu te, Swaraj-i leh Rajasthan Chief Minister Vasundhara Raje-i te ban tura an phutte thu te a tel a ni. Mahse nimin rorel inkhawmah hian Prime Minister Narendra Modi a tel lo.

Finance Minister Arun Jait­ley chuan eptute chu ṭul loah beng­chheng siamin, rorel thei loa harsatna siamah a puh.

Eptute chu thua sawihona lamah an chak lo a, mahse buaina siam tur erawh chuan an chak hle thung a ni tiin, Jaitley chuan BJP hruaitu tumahin dan an bawhchhe lo a ti a, party hruaitu tumah ban an awm dawn lo tiin an sawi bawk.

Congress MP Jyotiraditya Scin­dia chuan eptu party hrang hrang­te'n BJP minister pakhat leh chief minister pahnih, thil tidik lo leh eiruknaa inhnamhnawiha puhte chungah action lak phawt an phut thu a sawi. "Dik lo taka thiltite hi hrem ngei turin kan phut a ni. BJP sorkar hian langtlang sorkar chungchang a sawi fo a, a thusawi te chu a taka a kalpui a hun tawh a ni," a ti.

NDA sorkar chuan Sushma Swaraj-in Lalit Modi a ṭanpui chungchangah debate neih a inpeih thu sawi mah se, Rajasthan CM Raje-in Lalit Modi a puih dan leh, Madhya Pradesh-a dik lo taka professional course zir tur lakna, Vyapam scam chungchang erawh chu state issue a nih vangin sawiho theih a ni lo tih a sawi. Mahse eptu hruaitute chuan heng thil pahnihte hian rampum a huap a, Vyapam scam kaihhnawihah hian mi 40 chuang zet an thi tawh bawk a, hei vang hian Parliament-a sawiho ngei a ngai a ni, tiin an sawi thung.