IS flag hal vangin buaina a chhuak

VHP activist-te'n Islamic State (IS) firfiak pawl flag an hal duh lohna lantirin Jammu and Kashmir-a Rajouri khuaah kawng zawh a ni a, kawngzawhte leh police-te innawr avangin buaina a chhuak a, curfew puan zui nghal a ni.

VHP-ten IS flag an halah hian Muslim lehkhabu thianghlim, Koran chang ṭhenkhat ziahlan a ni a, hei vang hian Muslim mipuite chuan flag hal hi huain an duh lohna lantir nan kawngzawh hi an huaihawt a ni.

Kawng zawhte hian flag haltute chu zawngchhuak a, man ngei turin an phut. An zinga ṭhenkhat chuan police-te chu nawrin, an intibuai zui ta a ni.

Curfew puan a nih hnuah pawh Muslim ṭhalaite chu an chhuak lui a, police motor-te lungin an tawng zui a ni. Dan kalha che ṭhalai zinga 15 te chu police-te'n an man.

Rajouri khuaa Muslim-te chuan flag haltute chu man an nih thuai loh chuan bandh huaihawt an tum thu an sawi bawk.

Hetihlai state VHP patron, Ramakant Dubey chuan IS firfiakte chetdan chu an duh lo a, an pawikhawihna thlente an duh lohna lantirna atana an flag hal an nih thu a sawi. Dubey chuan, "IS flag kan hal ringawt a ni. Flag-a thu inziak hi Persian ṭawng a nih avangin eng thu nge tih kan hre lo a ni," a ti.