Delhi LG-in DCW hotu ruatna a hnawl

Delhi Chief Minister Arvind Kerjiwal leh Lieu­tenant Governor Najeeb Jung-te chuan thuneitu zawk nih an la inchuh zel a, nimin khan Delhi sorkarin Delhi Commission of Wo­men (DCW) hotu atana Swati Maliwal a ruatna chu LG hian a hnawlsak ve leh.

DWC chairperson tur ruat dawn hian Delhi CM-in a rawn lo tih Jung chuan a sawi a, hei vang hian sorkarin a ruatna hi pawm a ni lo, a ti. DM leh Chief Secretary hnenah pawh a thutlukna siam chungchang hi ziakin a hriattir tawh a, a phalna tel loin DCW hotu tur hi ruat theih a ni lo tiin a sawi.

July 18 khan Delhi sorkar chuan DWC chair­person Barkha Shukla chu thlakin, a aiah kum 30 mi Maliwal hi a dah a ni. Maliwal hi AAP hruaitu Naveen Jaihind-a nupui a ni. Barka Shukla a thlak hma in Maliwal hi CM Kejriwal-a advisor (grievances) a ni.

DWC hotu atan Mali­wal ruat a nih dawn hian eptu lamte chuan nasa takin an sawisel a, AAP hruaitu nupui a nih avanga duhsakah an puh. Mahse AAP chuan duhsak bik nei loin, kalphung dik taka ruat a nih thu a sawi thung.

Maliwal-i hian Thawh-ṭanni aṭang khan a hna thar hi a zawm a, ban a nihna hi a la hmuh loh thu a sawi. "Official-a hriattirna engmah ka la hmu lo a, ka hna ka la thawk chhunzawm a ni. Delhi sorkar min ruat a ni a, sorkarin min ruatna hi a sut leh a nih chuan ka pawm ang," a ti.