Hurriyat hotu hnenah passport pe

Jammu and Kashmir-a India lak aṭanga inlakhran duhtu pawl, Hurriyat hruaitu Syed Ali Shah Geelani chu sorkar laipui chuan thla kaw chhung nung tur, passport a pe chhuak ta.

Geelani-a passport dilna hi information a pek kim loh avangin May thla khan hnawlsak a lo ni tawh a, mahse a dil nawn leh hnuah sorkar laipui chuan a phalsak ta a ni.

Hurriyat hruaitu hian Saudi Arabia-a fanu damlo kan turin passport hi online hmangin a dil a ni. Mahse dan thar hnuaiah a diltu hian a thla la tur leh, a chanchin kimchang ziak turin amah ngei passport offica-ah a inlan a ngai a ni. A dilna hmasa zawkah hian a biometric detail a telh lo a, thlalak a thehluh tel loh bakah fee a pe lo bawk.

Geelani-a hnena passport pek leh pek loh chungchangah hian J&K-a ṭangrual sorkar siamtu, BJP leh PDP-te ngaih­dan a inang lo hle. PDP chuan Geelani chu thildang vang ni lo, a fanu damlo kan tur a nih avangin passport pek ngei a duh laiin, BJP chuan India dodal zawnga a thusawi leh thiltihte avanga thupha chawi phawt turin a phut thung.