Parliament Session: Rorel thei loin inkhawm titawp

Parliament Monsoon Session chu nimin khan ṭan a ni a, mahse inkhawm ṭanni-ah hian eptute chuan eirukna leh thil dik lo tihnaa inhnamhnawiha puh hruaitute chu bang tura nawra an aubuai avangin rorel thei loin inkhawm tihtawp a ni.

Rajya Sabha-ah chuan inkhawm ṭan a nih veleh, Congress party-te chu house laiah chhuak khawmin hminghliauna nei BJP hruaitute chu bang turin an phut a, dan bawhchhetu ILP hotu hlui Lalit Modi chungchang, BJP hruaitute'n an ṭanpui dante chu sawichhuah an phut bawk. Eptute hi an au bengchhen avangin speaker chuan rorel a titawp lailawk. Chawhnu lama inkhawm chhunzawm a nih hnuah pawh awmze neia inkhawm kalpui theih anih loh avangin tihtawp a ni leh bawk.

Lok Sabha-ah pawh sunna hun hman a nih zawh hnuin thu dang ngaihtuah loin inkhawm tihtawp a ni. Nimina member sunte hi MP hlui 13 leh MP nilai thi ta pakhat an ni.

Congress party chuan dik lo taka thiltihnaa inhnamhnawih, Congress hruaitu pathum- External Affairs Minister Sushma Swaraj, Rajasthan Chief Minister Vasundhara Raje leh Madhya Pradesh Chief Minister Shivraj Singh Chouhan-te chu ban an nih loh chuan rorel inkhawm tihbuai zel an tum thu a sawi. Congress hian Lok Sabha-ah member 44 chauh nei mah se, a nawr nat dan azirin rorel a tihbuai theih hle rin a ni a, Rajya Sabha-ah chuan party mala member tam ber niin thutlukna pawimawh siam dawn chuan a thlawpna neih a pawimawh hle.